ILOILO CITY – Ginatudlo sang mga pumuluyo sang Barangay Magsaysay Village, La Paz, Iloilo City ang latayan sa ginaka-ayo nga esplanade nga amo ang rason sang pagbaha sa lugar kag sa kaiping pa nga mga barangay.
Sa interview sang Bombo Radyo kay Danilo Tiope, residente sang barangay, iya ginpahayag nga may ginbutang nga tamburong sa nagaserbe latayan sang heavy equipment nga amo ang rason sang pagsaka sang lebel sang tubig sa lugar.
Suno kay Tiope, ang tubig ulan sa barangay ang wala nagakadto sa suba bangud nga ginasugata man ini sang makusog nga tubig nagikan sa suba kag naga-apekto pa ang taob.
Dugang pa niya, tuman ka gamay sang tamburong para sa volume sang tubig nga nagasugat-anay.
Sang nagtaas ang lebel sang tubig sa barangay, gilayon man nga nagreklamo ang mga residente sa naga-ubra sa esplanade.
Ginkuha ang amo nga tamburong kag nagnubo man sa gilayon ang lebel sang tubig.
Nagpasalig man ang naga-ubra sang esplanade nga sa tion nga matapos na ang construction, kuhaon ang tamburong kag indi na maka-ekspeyensya sang pagbaha ang mga residente sa lugar.
