Nagpasalig si President Ferdinand ”Bongbong” Marcos Jr. nga handa ang gobyerno sa tuman ka taas nga presyo sang produktong-petrolyo nga natalana nga ipatuman sa masunod nga semana.
”Malinaw sa atin ang tanong ng maraming Pilipino ngayon: Ano ang gagawin ng pamahalaan? Naghahanda na po tayo,” kabahin sang pahayag sang presidente sa isa ka video message nga gin-release subong nga gab-i.
Ginpahat-pahat sang presidente kun ano ang iya ginahimo.
Lakip diri ang pagpakig-angot sa Kongreso agud nga mahatagan siya sang awtoridad nga buhinan ang excise tax kun maglapaw na ang presyo sang krudo sa $80 per barrel.
”Una. Nakikipag-ugnayan na tayo sa Kongreso upang mapagkalooban ang Pangulo ng pansamantalang kapangyarihan upang bawasan ang excise tax sa mga produktong petrolyo kung papalo ito sa 80 US dollars kada barrel,” pahayag sang punong ehekutibo.
Ginpasalig man sini nga gilayon man nga ipaguwa ang fuel subsidies kag ang cash transfers para sa apektado nga mga sektor.
Suno pa kay Marcos, naga-istorya na siya sa mga mamalidha agud nga amyendaran ang Biofuels Act of 2006 para sa utilization sang mas barato nga bioethanol.
Una na nga ginpahayag sang Department of Energy (DOE) nga posible nga magdangat sa masobra P80 kada litro ang presyo sang diesel kun indi pagpahat-pahaton ang pagpatuman sang price hike sa produktong-petrolyo.
Suno ini kay DOE Oil Management Bureau Director Rino Abad kadungan sang iya pagpaathag sa hearing sang Senate Committee on Foreign Relations nga ginapangunahan ni Senator Erwin Tulfo.
Suno kay Abad, sang tion nga nag-ibwal ang tensyon sa tunga sang Ukraine kag Russia, nagdangat ang presyo sa P90 kada litro.
“Yung Ukraine-Russia…umabot po tayo ng mga P90 kasi. Ayoko po mag-project pero ito’y mas masama pa doon eh kasi ito Middle East ang pinag-uusapan,” suno kay Abad.
Ini ang rason suno sa iya kun ngaa dapat staggered ukon pahat-pahat lang ang price hike kag indi isa lang ka pusdak sang saka-presyo.#
