Naga-yellow bala ang imo nga supat kag nagasakit ang imo tyan kag lawas?
Mahimo nga sintomas na ina sang Hepatitis A, nga isa ka balatian sa atay nga madasig maglaton sa tawo.
Suno kay Dr. Bernadette Seludo, infectious disease specialist, makuha ang Hepatitis A kun nakaptan, nainom ukon nakaon ang isa ka butang nga kontaminado sang feces ukon higko nga may yara sang Hepatitis A.
Paathag ni Seludo, ang mayor nga kabangdanan sang Hepatitis A amo ang higko sang isa ka indibidwal nga mahimo maglapta kun indi ini maghugas sang iya kamot.
Masami nga makuha ang ini nga balatian kun mahilig ang isa ka tawo magkaon sang street food nga yara sa karsada bangud mas madasig ini makaangkon sang virus.
Halimbawa amo ang isaw sang manok sa diin may yara sang kahigayunan nga nagatingob ang higko sang manok sa sulod sini.
Pila lamang sa sintomas sang Hepatitis A amo ang pag-angkon sang sakit, nagasuka, nagakakapoy, nagasakit ang tyan, wala gina ganahan sa pagkaon, naga duag yellow ang mata kag supat kag tuman nga pagkatol sa lawas.
Mahimo man ini makuha sa pakikipag-sex kag mahimo pa nga ikonsidera nga sexually transmitted disease.
Malikawan man dugang pa ni Seludo ang nasambit nga balatian kun regular nga nagahugas sang kamot kag nagahalong sa pagluto ukon pag pili sang pagkaon.
Panugyan sang eksperto, kun mabatyagan ang mga sintomas sang Hepatitis A, gilayon nga magpakonsulta sa doktor.
