ILOILO CITY – Ginsaysay sang isa ka long time pediatrician ang mga masami balatian sang mga kabataan sa tion sang summer.
Sa interview sang Bombo Radyo kay Dr. Emiliana Carmona, iya ginpahayag nga kalabanan sang mga masakit sa kabataan ang nagatukar sa panit.
Suno kay Carmona, ang pila sang mga masami nga balatian sang kabataan amo ang bungang balhas, sun burn kag infection bangud sa paghampang sa mahigko.
Dugang pa ni Carmona, ang pagpaligo sang mga kabataan sa mga swimming pool ang posible nga makatuga sang balatian kag impeksyon sa panit ilabi na kun indi matinlo ang maintenance sang tubig.
Nagpaandam naman si Carmona nga bantayan ang bata nga indi gid mag-inom sa mga posible contaminated nga tubig bangud nga makamamatay ang mahimo epekto sini.
Ang dehydration ang resulta sang problema sang gastroenteritis nga kun indi sa gilayon madala sa ospital, mahimo nga mapatay ang bata.
Pahayag dugang ni Carmona, sa tion nga may makita nga sintomas sang sini nga balatian sa mga kabataan, dapat nga maislan ang fluid nga nabuhin sa lawas sang bata bangud sang dehydration.
Sa subong, may yara na sang ginabaligya nga oral dehydration salt nga mahimo nga ipainom sa bata kun indi sa gilayon nga madala sa ospital.
Nagpaandam naman si Carmona nga dapat taguon sang maayo ang mga gina-inom sang kabataan agud nga malikawan ang impeksyon.
Samtang, bisan ang mga kabataan ang mahimo man nga ma-igo sang heat stroke bangud sang madugay nga exposure sa mainit.
Agud nga malikawan ini, mag-inom sang madamo nga tuig kag indi mag padugay sa initan.
