ILOILO CITY – Yara pa lang sa 3-day trial period ang pagpinta sang bike lanes sa syudad sang Iloilo.
Ini ang paathag sang Iloilo City Engineer’s Office matapos nga nakakas ang latex paint nga gingamit kasunod sang pagbubo sang mabaskog nga ulan sang nakaligad nga adlaw.
Sa interview sang Bombo Radyo kay Engr. Salvador Pedregosa, pinuno sang Iloilo City Engineer’s Office, iya ginpahayag nga ang latex paint nga gingamit para sa inter-connection sang bike lanes ang gindonar sang isa ka kompaniya.
Suno kay Pedregosa, naglab-ot sa 120 gallons ang gindonar kag ila ini nga gingamit sa bike lanes nga yara sa Molo Plaza padulong sa MH Del Pilar kun sa diin semento ang dalan samtang aspalto naman ang sa bike lane nga yara sa dalan Gen. Luna sa City Proper.
Ginpahayag ni Pedregosa nga mahimo nga nakakas ang puti kag green nga latex paint bangud sa tuman ka init nga tiyempo apang pag-abot sang hapon ukon gab-i, nagabubo naman ang mamunog nga ulan.
Magluwas diri suno kay Pedregosa, indi compatible ang latex paint nga ipinta sa karsada apang bangud nga madamo ang gindonar sa Iloilo City Government, ila ini nga gingamit para sa testing.
Ang prescribed nga pinta para sa karsada suno sa natungdan amo ang thermoplastic.
