ILOILO CITY – Ginkasuhan na sang kapulisan ang suspek nga nagluthang-patay sa lalaki sa dalan Iznart, Iloilo City Proper.
Nahibaluan nga ang mga suspek amo sanday Andy Mahinay alyas “Hapon”, 38-anyos, residente sang Brgy. Nonoy, City Proper; kag iya Ihado nga si alyas “Janjan”, 16-anyos kag anak ni Barangay Kagawad Rolando Jaleco.
Sa interview sang Bombo Radyo kay Police Major Francisco Paguia Jr., hepe sang Iloilo City Police Station 1, iya ginpahayag nga ang mayor nga motibo sang krimen amo ang pagpangawat kag ginkasuhan sang Robbery with homicide ang suspek nga si Hapon.
Suno kay Paguia, may pag-agaway pa nga atabo sang sling bag sang biktima nga Chinese national kag ni Hapon rason nga gintiro ini niya kag gilayon nga nagpalagyo.
Pahayag sang natungdan, ang suspetsado nga menor de edad ang nangin accomplice bangud nangin look-out ini sa mga kapulisan nga posible yara sa palibot samtang ginaluntad ang pagpangawat.
Dugang pa sang police major, nagsungka naman ang menor de edad kag ini man ang nagpanugid tuhoy sa krimen sang iya ginpahayag nga maninoy nga si Hapon.
Samtang, nagpasalig naman ang kapulisan sa pagpadayun sang peace and order sa syudad sang Iloilo bangud nagasanib pwersa man sila lakip na ang mga barangay official, kag mga tanod sa pagbantay sang syudad humalin gab-i tubtob mag aga.
