MANILA – Ginbasol ni Health Secretary Francisco Duque III ang iya mga kaupdanan sa Department of Health (DOH) sa natabo nga delay sang release sang financial assistance para sa mga health workers nga nagsuprer sang coronavirus disease 2019 (COVID-19).
Sa taped briefing sang Inter-Agency Task Force on Emerging Infectious Diseases subong nga Biyernes, Hunyo 5, ginpahayag ni Duque kay Presidente Rodrigo Duterte nga “unacceptable” ukon indi mabaton ang tuman ka hinay nga pag-proseso sang benepisyo para sa mga health frontliners nga napatay samtang nagapakigbato sa COVID-19 outbreak.
Suno kay Duque, wala sang “sense of urgency” ang iya mga tinawo gani bisan siya mismo ang nagalain man ang buot.
Ginpahayag man sang opisyal nga ginmanduan na niya ang iya mga tinawo nga indi anay magpauli tubtob wala pa nabaton sang mga benepisyaryo ang ginpasalig nga ayuda.
May kaangtanan diri, ginmanduan ni Presidente Duterte si Duque nga magtukod sang team agud dumalahan ang distribution sang ayuda.
24 ka oras ang ginhatag nga tion sang presidente agud makapangita sang mga tawo nga tampad kag makahatag sang cash assistance sa nagakaigu nga benepisyaryo.
Nahibaluan nga sa record sang DOH, 32 ka health workers ang napatay bangud sang COVID-19 — 4 ang nurses, 26 ang doctors kag 2 ang non-medical staff.
