ILOILO CITY – Padayon nga ginalagas sang mga otoridad ang tatlo ka miyembro sang New People’s Army (NPA) nga nangkarnap sang isa ka tourist van sa Barangay San Antonio, San Miguel, Iloilo.
Sa interview sang Bombo Radyo Iloilo kay Police Insp. Francis Albert Fortunado, hepe sang San Miguel Municipal Police Station, ginpahayag sini nga nagtransaksyon ang isa ka nagpakilala nga “Ma’am Grace” nga maarkila sang van.
Gintanyagan ini sang car rental sang Grandia 2016 model nga may temporary plate number.
Nagikan pa ang mga nagtransaksyon sa Iloilo International AIrport sa Sta. Barbara, Iloilo apang nakasugtan nga magtabuay ang mga ini sa San Antonio, San Miguel, Iloilo.
Apang pag-abot sa lugar, gintayaan sang armas sang nagpakilala mga miyembro sang NPA ang driver nga si Charles Pacances sang Barangay Palje, San Enrique, Iloilo kag gin-agaw ang ginamaneho nga salakyan.
Kasunod sini, nagpatigayon sang hot pursuit operation ang mga otoridad kag narekober ang Grandia sa Sitio Sooc, Rizal St. sa banwa sang Oton, Iloilo apang nakapalagyo na ang mga suspek.