𝗜𝗟𝗢𝗜𝗟𝗢 𝗖𝗜𝗧𝗬 — Naglab-ot sa 6,000 ka mga indibidwal ang nagpasakop sa ginhiwat nga pride march subong nga adlaw sa Iloilo City, kadungan sang pagselebrar sang pride month subong nga bulan.
Sa interview sang Bombo Radyo kay Gab Umadhay, Executive Assistant for LGBTQIA+, iya ginpahayag nga naga-ekspektar siya nga kapin 3,000 lang ang magatambong sa selebrasyon, apang nangin doble ini, rason man nga ginakalipay niya ang madinalag-on nga kahiwatan.
Suno kay Umadhay, dako ang iya pagpasalamat sa mga politiko kaangay na lamang kay Iloilo City Lone District Representative Jam-jam Baronda kag Raisa Treñas-Chu nga nagpakita sang suporta agud nga matigayon ang selebrasyon.
Ginpahayag man sini nga ang pagpakita nila sang suporta ang isa ka visibility nga ila ginapangita sa ila komunidad agud nga mapasanyog ang ila nga adbokasiya nga patas nga kinamatarong sa tanan.
Gin-athag man sini nga ang selebrasyon ang isa ka tikang agud ipakigbato ang hayag kag patas nga sosyudad para sa ila nga myembro sang lesbian, gay, bisexual, transgender, queer, questioning, intersex, asexual ukon LGBTQUIA+.
