Napaslawan nga makabulsa sang medalya sa all-around finals sang men’s artistic gymnastics sa Paris Olympics ang tiglawas sang Pilipinas nga si Carlos Edriel Yulo ukon si Caloy Yulo.
Sa kumpetisyon nga nagsugod 11:30 sa gab-i oras sa Pilipinas kag nagtakop pasado na ‘las dos sa kaagahon, ginpabilib man ni Yulo ang mga tumalan-aw bangud sa pagbato sini sa isa ka masandukot nga away sang mga beterano nga gymnasts kun sa diin nagpang-12 pa ini sa overall standings.
Nagdangat tanan sa 83.032 puntos ang natipon sang 24-anyos nga Pinoy pride sa tanan nga apparatuses.
Sa imbukada nga apparatus nga amo ang pommel horse, malimpyo ang nangin opening act ni Yulo apang sang buot na sini nga tapuson ang iya routine, nadulaan ini sang balanse rason nga nahulog sa mat kag rason man nga nagsarurot sa 11.900 points ang iya skor nga amo ang pinakamanubo sa 24 nga nag-compete.
Mas manubo pa ini sa iya qualification round performance nga may 13.006.
Wala nadulaan sang paglaum si Yulo kag nag-recover pag-abot sa rings nga may 13.933 points kag nag-angkon man sang 14.766 sa iya pet event nga vault rason nga nagsaka ang standing.
Sa parallel bars, nakakolekta ini sang 14.500 points rason nga nagsaka sa 12th spot matapos ang ikaapat nga rotation.
Ginpasagunsunan ini sang 13.600 markers sa horizontal bar, antes ang isa pa gid sini ka forte nga amo ang floor exercise kun sa diin nakaangkon ini sang 14.333 points.
Nagpanguna sa sini nga finals si Shinnosuke Oka sang Japan nga may 86.832 samtang ang Chinese duo nga sanday Boheng Zhang kag Ruoteng Xiao ang nakabulsa sang silver kag bronze medals.
Wala pa nagtakop ang kampanya ni Yulo sa Summer Games bangud sulod man ini sa medal rounds sang floor exercise sa Sabado kag vault sa Domingo.#
