Natumod na ang mga naka close contact sang apat ka mga Locally Stranded Individuals nga nagpositibo sa Coronavirus Disease 2019 (COVID-19) sa banwa sang Sta. Barbara, Iloilo.
Sa interview sang Bombo Radyo kay Sta. Barbara Mayor Rema Somo, iya ginpahayag nga Hunyo 21 sang nag abot sa banwa ang Locally Stranded Inividuals, Huynyo 24 sang ginkuhaan sang swab sample kag Hunyo 29 nagguwa ang resulta nga positibo ang mga ini sa COVID-19.
Suno kay Somo, ang driver kag health worker kag nag assist sa mga Locally Stranded Individuals padulong sa quarantine facility amo ang mga naka close contact sang apat ka mga LSIs.
Nahibaluan nga ang 4 ka mga Locally Stranded Individuals ang halin sa Metro Manila kag negatibo man ang resulta sang rapid test antes magpauli sa Iloilo.
Samtang wala sang dapat nga kabalak-an ang mga pumuluyo sang San Joaquin, Iloilo sa pagpositibo sang duha ka mga locally stranded individuals sa nasambit nga banwa.
Sa interview sang Bombo Radyo kay Leo Satana, Municipal Administrator sa San Joaquin, iya ginpahayag nga wala na sang may ginkadto-an pa ang mga locally stranded individuals magluwas lang sa quarantine facility sa diin sila gindiretso pag-abot nila sa Iloilo.
Hunyo 23 nag-abot sa Iloilo halin sa Metro Manila ang amo nga mga COVID-19 patients kag Hunyo 24 sila ginkuhaan sang swab sample.
