ILOILO CITY – Gindepensahan sang Police Regional Office 6 (PRO-6) ang naka-full battle gear nga PNP personnel nga nagaserbe escort sang Department of Environment and Natural Resources (DENR) sa pagserbe sang show cause order sa mga resorts sa Boracay.
Kasunod ini sang reklamo sang pila ka tag-iya sang resort nga naghatag sang kakulba sa pila ka mga guests ang presensiya sang mga pulis nga malagba pa ang armas.
Sa interview sang Bombo Radyo Iloilo, ginpahayag ni PRO-6 spokesman Supt. Gilbert Gorero nga mismo ang DENR ang naghingyo sa pulis nga mag-escort sa pagserbe sang show cause order.
Tungod kulang ang puwersa sang kapulisan sa Malay, Aklan, gin-augment ang Regional Mobile Force Battalion.
Suno kay Gorero, ang malagba nga armas nga bitbit sang mga ini amo ang ila issued firearms.
Gin-athag naman sang PRO-6 nga wala sang pamahog sa seguridad sang Boracay apang ginhugtan ang pagbantay sa isla bangud sang kahangawa sang spillover sa Marawi siege.
Apela ni Gorero nga indi pagmalisyahan ang presensiya sang mga naka-full battle gear nga PNP personnel sa isla sang Boracay mangin ang presensiya sang militar bangud antes pa man nakalab-ot sa atensyon ni Presidente Rodrigo Duterte ang problema sa isla, nakahanda na ang paglunsyar sang task force para sa Boracay.