ILOILO CITY – Magasunod ang syudad sang Iloilo sa mandu sang Department of the Interior and Local Government (DILG) nga ipatigayon liwat ang road clearing operations umpisa Nobyembre 16.
Ini ang may kaangtanan sa gin-isyu ni Interior Secretary Eduardo Año nga Memorandum 2020-145 nga nagahatag sa local government units (LGUs) sang tion tubtob sa Enero 15, 2021 nga hawanon ang mga dalanon apang depende sa quarantine classification sang lugar.
Sa interview sang Bombo Radyo kay Iloilo City Mayor Jerry Treñas, iya ginpahayag nga may mga areas pa sa syudad nga dapat hawanan bangud naghalog ang mga pagsulundan kag nagbalik ang mga obstructions bangud nauntat ang road clearing operations bangud sa COVID-19 pandemic.
Suno sa alkalde, sapulon niya ang Public Safety and Transportation and Management Office kag ang Anti-Squatting and Illegal Structures Unit sa masunod nga semana agud hambalan ang pagpanghawan.
Suno naman kay Department of the Interior and Local Government (DILG) – Region VI Director Juan Jovian E. Ingeniero, may yara pa sang dapat athagon sa central office sang DILG may kaangtanan sa monitoring sang pagpanghawan.
Athagon pa sang natungdan kun ang monitoring ang himuon sang barangay ukon sang LGU.
Athagon man suno kay Ingeniero ang guidelines sang implementasyon bangud naka-general community quarantine pa ang syudad sang Iloilo kag Bacolod.
Nahibaluan nga sa MGCQ areas, required ang LGU nga sundon ang DILG Memorandum Circular 2020-027 nga nagasiling nga dapat limpyuhan ang obstruction kaangay sang vehicular terminals magluwas sa gindesignar sang LGU; vending sites; house encroachments nga nagasabad sa right-of-way; debris, waste materials, kag iban pa nga masabad sa dalan.
Sa GCQ areas, partial lang ang pagpatuman sang clearing operations.
