Nagmando si President Ferdinand Marcos Jr. sa Department of Public Works and Highways (DPWH) nga pasabton kag i-blacklist ang mga palpak nga mga kontraktor nga naangot suno sa iya sa delayed kag pakpak man nga flood control projects sa Iloilo.
Ginpahayag ini ang presidente matapos ang pagbisita sa Iloilo City kahapon, Agusto 13, kun sa diin personal ini nga nagpatigayon sang inspeksyon sa pila ka flood mitigation initiatives.
Lakip sa iya nga ginkadtuan amo ang Flood Mitigation Project sa Sections 9 kag 10 sa Barangay San Isidro, Jaro, Iloilo City kaupod si DPWH Secretary Manuel Bonoan, Mayor Raisa Treñas, kag Rep. Julienne “Jamjam” Baronda.
Ginsulit sang presidente nga indi pag-itolerar sang iya administrasyon ang substandard nga trabaho kag mga delay.
“Sa aking pagbisita sa Iloilo, nakita natin ang mga delayed at palpak na flood control projects na lalo pang nagpapalala ng pagbaha. Inatasan ko ang DPWH na panagutin at i-blacklist ang mga palpak na contractors,” suno kay Marcos sa iya nga Facebook post.
Gin-engganyo man sini ang publiko nga kun may makit-an nga flood control projects nga may kurapsyon ukon anomaliya, mahimo ini ma-report sa sumbongsapangulo.ph nga amo ang website nga iya ginlunsar subong lamang nga semana.
“Sa ating mga kababayan, kasama kayo sa laban kontra katiwalian at pagbaha. I-report ang mga anomalya sa sumbongsapangulo.ph.
Sama-sama tayong kumilos para sa mas ligtas na Bagong Pilipinas,” dugang sang chief executive.
Sa statement naman ni Mayor Treñas, ginpahayag sini nga nagapasalamat gid siya nga ang presidente gid mismo ang personal nga nakakita sang mga “PALPAK” kag “DELAYED” nga flood control projects diri sa Iloilo City nga suno sa iya sa idalom sang DPWH-Iloilo City District Engineering Office. Nagpanawagan man si Treñas sa national government nga pa-untaton ang indi man kinahanglanon nga flood control projects kaangay sa Mohon, Tagbak, kag iban pa nga suno sa iya indi man epektibo sa pagsabat sa problema sa baha.#
