Mahimo nga mapreso ang isa ka Vietnamese national nga padayon pa nga ginapangita sang mga otoridad tubtob subong matapos nagpalagyo sang nagpositibo sa COVID-19.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga sa idalom sang Republic Act 11332 ukon ang “Mandatory Reporting of Notifiable Diseases and Health Events of Public Health Concern Act” ginadumilian ang mga masunod:
- Indi otorisado nga pagpahayag sang pribado kag confidential nga mga impormasyon may kaangtanan sa medical condition ukon treatment sang isa ka pasyente;
- Pagtamper sang records ukon hungod nga paghatag sang sala nga impormasyon;
- Non-operation sang disease surveillance kag response systems; kag
- Non-cooperation sang isa ka indibidwal ukon grupo nga gintumod nga may yara sang notifiable disease, ukon apektado sa isa ka health event sang public concern.
Suno kay Conlu, kun sin-o man ang magalapas sa RA 11332, dagdagan ang mga ini sang multa nga indi magnubo sa P50,000 kag pagkapreso nga indi magnubo sa anom ka bulan.
Pahayag ni Conlu, may mga impormasyon sila nga nabaton nga posible nakapadulong na sa Cebu City ang Vietnamese national.
Apang may impormasyon man sila nga nabaton nga may yara man siya sang ginapulian sa Mindanao.
Bangud sini suno kay Conlu, nagapabilin sila nga naka-alerto kaupod ang Iloilo City Police Office, Iloilo Police Provincial Office kag Philippine Coast Guard sa pagpangita sa nalagyo nga Vietnamese national.
Samtang, suno naman kay Punong Barangay Vismin Cañal sang Quezon, Arevalo, Iloilo City, pila na ka bulan ang nagligad sang nakahalin ang Vietnamese national kaupod ang iya walo ka tinawo sa apartment nga gin-akupar sang mga ini sa nasambit nga lugar.
Sa interview sang Bombo Radyo kay Cañal, iya ginpahayag nga may yara sang negosyo ang Vietnamese national sa diin masami ini nga nagabyahe sa Northern Iloilo ukon 5th district sa diin ginapahayag nagabaligya kag nagadeliver ang mga ini sang produkto nga mga tent kag iban pa.
Ginapahayag nga ang Vietnamese national kag iya mga kaupdanan ang may dala nga tatlo ka mga salakyan.
Suno kay Cañal, bangud magasaylo kuntani ang Vietnamese national kalakip na ang walo sini ka mga tinawo sa Palawan, nagpaidalom ang mga ini sa saliva COVID-19 test sa syudad sang Passi bilang requirement sa pagbyahe.
Nagwa nga nagpositibo sa COVID-19 ang Vietnamese national apang nagnegatibo naman sa virus ang walo sini ka mga tinawo.
Sugod sang ginforward sang Passi City sa City Epidemiology and Surveillance Unit (CESU) sa syudad sang Iloilo ang resulta sang COVID-19 test sang Vietnamese national, wala na ini nagasabat sa iya cellphone kag indi na makontak.
Una naman nga ginkumpirma sang Philippine Coast Guard (PCG) nga wala sang Vietnamese national nga nakasakay sa bisan ano nga vessel ukon shipping line padulong sa Palawan.
Sa pihak sini, ginpat-od sang alkalde sang syudad sang Iloilo nga sa tion nga makit-an ang Vietnamese national kag iya mga kaupdanan, pangpresuhon ang mga ini kag ipaidalom sa reverse transcription polymerase chain reaction (RT-PCR) test.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakalab-ot na sa iya ang impormasyon may kaangtanan sa nalagyo nga Vietnamese national matapos nahibaluan nga nagpositibo sa COVID-19.
Suno kay Treñas, ang accuracy sang saliva COVID-19 test ang indi kaangay sang RT-PCR test gani nagakadapat nga i-test liwat ang Vietnamese national kalakip na ang iya mga tinawo sa tion nga magkaladakpan.
Pahayag sang alkalde, nagakadapat nga dagdagan man sang nagakaigo nga multa ang Vietnamese national kag pasakaan sang kaso.
