Naga-umpisa na ang konstruksyon sang napabay-an nga proyekto sa East Timawa Road sa Molo, Iloilo City matapos nga mapasa na ang tanan nga kinahanglanon nga requirements sa Iloilo City District Engineering Office.
Suno kay Joy Fantilaga-Gorzal, spokesperson ni Mayor Raisa Treñas,ini nga development natigayon bangod sa koordinasyon sa tunga sang Iloilo City Government kag Iloilo City District Engineering Office.
Matandaan nga personal nga nakit-an ni DPWH Secretary Vince Dizon ang kahimtangan sang dalan matapos ginpabutyag ni Mayor Raisa Treñas nga sulod sang duha ka tuig, wala ini naobra.
Bangod sini, gilayon ginmanduan sang tiglikom Iloilo City District Engineering Office nga suguran ang proyekto kag tapuson ini gilayon.
Madumduman nga gin-suspend anay ang proyekto sang 2025 matapos gin-isyuhan sang cease and desist order kag stoppage order ni Jerry Treñas bangod sa indi pag-comply sang nagakaigu nga mga dokumento kaangay sang excavation permit, mayor’s permit, kag barangay permit.
Sa subong, suno kay Gorzal, may tatlo pa ka proyekto nga gina-coordinate na sang Iloilo City District Engineering Office sa Iloilo City Government agud malikawan na ang pagka-delay sang mga proyekto nga ginapatukod sa syudad.
