Seryoso nga ginakonsiderar ni Vice President Sara Duterte ang plano sa pagpadalagan bilang presidente sang Pilipinas sa 2028.
Ginpahayag ini ni Sara sang weekend kadungan sang pagtambong sa isa ka pribado nga event sa Panabo, Davao del Norte.
Pahayag sini, sang nagkadto siya sa Japan kag nagpakigkita sa overseas Filipino workers (OFWs), ginpamangkot siya kun mapapili siya sa 2028.
Dugang sini, ginakonsiderar na niya ini bangud indi niya mabatas ang estado sang Pilipinas subong nga nagakinahanglan gid nga himuson kag ireporma para nga mangin world-class.
“I’m seriously considering running in 2028 presidential elections dahil sa mga nakikita natin sa bayan natin na dapat ayusin, na dapat baguhin,” suno sa bise-presidente.
“Kailangan maging competitive tayo sa mga kapitbahay natin dito sa ating region at sa buong mundo. Napag-iiwanan na ang Pilipinas at ayaw natin ‘yun,” dugang pa ni Sara.
Ini nga statement sa pagkonsiderar sa pagpadalagan sa pagka-presidente ang natabo bisan nga may pag-us-os sa iya nga trust and satisfaction ratings kag may ginapangatubang pa nga tatlo ka mga impeachment complaint.
Sa pihak nga bahin, indi pa pinal suno sa vice president kun ano ang iya plano kag partisipasyon sa 2025 elections.
“Hindi ko alam kung makakatulong o makakasama sa mga kandidato ang pag-endorso ko sa kanila. Kaya pinag-iisipan ko ‘yun nang maayos,” pahayag sini.#
