𝗚𝗔𝗭𝗔 𝗦𝗧𝗥𝗜𝗣 —Naglab-ot na sa kapin sa 40,000 ka mga Palestinian ang napatay sa Gaza halin sang ginlunsar sang Israel ang ila inaway batok sa Hamas kasunod sang pag-atake sang grupo sang Oktubre 7 sang tinalikdan nga tuig.
Suno sa ministry, 40 ka tawo ang napatay sa Gaza sa sulod sang nagligad nga 24 oras, nga nagdala sang kabug-usan nga numero sang mga napatay halin sang Oktubre 7 sa 40,005 – mga isa sa kada 55 ka tawo sa enclave, kon sa diin, 92,401 ang napilasan.
Kalabanan sang mga napatay mga kababayin-an kag kabataan. Ginpahayag sang Israel sang nagligad nga bulan nga nakapatay sila sang masobra 14,000 ka mga combatants sa Gaza halin sang nagsugod ang inaway.
Dugang pa, indi magkubos sa 10,000 pa ka tawo ang nadula kag ginapatihan nga nalubong sa idalom sang mga duta sa Gaza.
Nahibaluan man nga ang nagasaka nga mga numero ang nagahatag sang rason sa adlaw-adlaw nga pag-antos kag malnutrisyon sa Gaza, pagkatapos sang 10 ka bulan nga inaway.
Ginalauman naman nga ang ceasefire talks nga nagsugod sang Huwebes, ang mangin epektibo kasunod sang pagpatay sa mataas nga mga tinawo sang Hamas kag militante nga grupo sang Lebanon nga ginasakdag sang Iran nga Hezbollah, rason man nga nagtulod sang liderato sang duha ka organisasyon nga maghimo sang negosasyon.
