ILOILO CITY- Tuman gid nga ginkakibot sang pila ka mga residente sang Cochero, Molo, Iloilo City nga ang napatay nga ginapatihan nga myembro sang rebelde nga grupo sa engkwentro sa Brgy. Aglonok, Calinog, Iloilo ang ila anay SK Kagawad nga pila ka tuig na nila nga wala nakita.
Ang napatay amo si Benjamin Cortel nga kilala nga Mamang/Amor, ang Political Officer sang Regional Headquarters (RHQ) Central Front of Komiteng Rehiyon – Panay (CF, KR-P) kag bana ni Lenilyn Custorio Jaynos, nga kilala nga Sandra, ang anay Finance Officer sang Komiteng Rehiyon-Panay kag nadakpan sang Setyembre 2022 sa Barangay Sibaguan, Roxas City, Capiz.
Sa interview sang Bombo Radyo kay Punong Barangay Marebel Dariagan sang Cochero, Molo, iya ginpahayag nga sang 1996 sang nagserbe ini nga SK Chairperson samtang SK Councilor naman si Cortel.
Suno kay Dariagan, isa ka maalam kag mabuot nga lider sang pamatan-on sa ila lugar si Cortel.
Pahayag niya, tuig 1998 sang wala na ini nakapakita sa ila lugar kag wala gid sila makahibalo kun sa diin ini nagkadto.
Halos indi man sila makapati nga nagsulod ini sa New People’s Army.
Matandaan nga nakaengkwentro sang 12th Infantry Battalion at indi magnubo sa 15 ka mga myembro sang rebelde nga grupo kun sa diin nalakip diri si Cortel.
Nagresulta man ang engkwentro sang pagkapilas sang nawala nga mata sang isa ka soldado nga sa subong yara naman sa mayo nga kondisyon.
Matapos ang engkwentro, nakuha naman sa encounter site ang mga matag-as nga kalibre sang mga armas, mga bala, granada, gadgets kag iban pa nga mga kagamitan.
