Nagnegatibo sa swab test ang 77 anyos nga lalaki nga una na gindali-dali nga ipalubong sa Barangay Poblacion, Nueva Valencia, Guimaras bangud gindudahan nga infected sang COVID-19.
Sa interview sang Bombo Radyo kay Erlyn Emberga, anak sang napatay nga tigulang, iya ginpahayag nga lima ka adlaw matapos ginpilit nga ipalubong ang iya nga amay, naggwa ang resulta sang COVID-19 test.
Nagalain ang buot ni Emberga kag sang iya bug-os nga pamilya bangud suno sa iya, ginpahingagaw gid lubong bisan ‘las otso sa gab-i ang iya nga amay kag kaangay sa sapat ang pagkabig sa iya.
Wala na sila sang mahimo suno sa natungdan bangud sigurado nga mabaho na ang bangkay sang iya nga amay.
Plano subong sang pamilya nga magpa-misa agud mapangamuyuan ang ila nagtaliwan nga himata.
