ILOILO CITY – Magasugod na subong nga adlaw ang mandatory training sa mga nagdalaug nga Sangguniang Kabataan officials.
Suno kay City Local Youth Development Office head Jason Gregorio, napaidalom sa SK Reform Law ang mandatory training kag indi mahimo nga indi magtambong diri ang mga na-elihir nga SK officials.
Kalakip sa mga topiko nga talakayon sa training ang tuhoy sa pagplano sang mga proyekto sang SK, nagakaigo nga pagdumala sang mga pondo kag ang Code of Ethics sa mga public officials.
May mga schedule na suno kay Gregorio ang tagsa ka distrito kag nagalaum sila nga kuhaon ini nga kahigayunan sang mga SK officials agud mapaayo pa gid ang ila pagserbisyo.
Plano naman sang City Department of the Interior ang Local Government nga magpatigayon sang eleksyon para sa SK Federation sa siyudad sang Iloilo, sa Mayo 28 tubtob 29.
Suno kay Atty. Ferdinand Panes sang City DILG, sa idalom sang RA 10742 ukon ang SK Reform Law, dapat nga maka-elehir na ang mga SK sang ila opisyal sa palaabuton nga Mayo 29, 2018.
Pahanumdom naman ni Panes sa mga SK officials nga dal-on sang mga ini ang ila Certificate of Proclamation kag completion sang mandatory training.
Pananglitan may kulang, indi na sila pagpahanugutan nga makatambong pa sang election sa SK federation sang siyudad.
Nahibaluan nga sa siyudad sang Iloilo, may ara sang 1,142 ka mga SK officials sa diin 178 diri ang SK Chairman.