ILOILO CITY- Gin-abisuhan sang Bangko Sentral ng Pilipinas (BSP) ang mga commercial establishment kag bangko nga dapat nila nga batunon ang mga nakapilo nga kwarta—papel man ukon polymer.
Ginhimo sang BSP ang abiso kasunod sang naggwa nga report nga isa ka mall nagbalibad nga batunon ang ginbayad nga P1,000 polymer bill bangud ginpilo ini.
Sa interview sang Bombo Radyo Iloilo kay Dr. Greg Baccay, acting Bank Officer 5 sang BSP Visayas Regional Office, iya ginpahayag nga mahimo gihapon magamit ang papel ukon polymer bilang pambayad.
Suno sa iya, mahimo nga batunon ang polymer bills sa kondisyon nga indi ini “mutilated” kaangay sang pagkagisi.
Pahayag niya, nagpagwa naman ang BSP sang guidelines kun paano halungan ang bag-o nga polymer banknotes.
Kalakip diri ang pagbutang sang kwarta sa wallet nga malapad para makaigo ang kwarta kag ipabilin ini nga matinlo.
Suno pa kay Bacay, para man sa pagpabilin sang currency integrity ang amo nga pahanumdom.
