ILOILO CITY – Maga-utang sang P10 billion ang National Power Corporation agud nga masiguro nga ang mga magagmay nga power plants ang may bastante nga gatung para ma-sustain ang electricity supply sa off-grid areas subong nga tuig.
Ang loan ang bayaran pinaagi sa additional charges nga i-impose sa idalom sang universal charge for missionary electrification sang Energy Regulatory Commission.
Gin-aprubahan sang Energy Regulatory Commission ang saka sa universal charge for missionary electrification sa 4 centavos per kilowatt hour, baliskad sa 15 centavos kWh nga ginpromisa bangud suno sa ila, ginapatuman ang amo nga surcharge agud nga mahagan-hagan ang epekto sa main grid customers.
Suno kay Energy Regulatory Commission chairperson Monalisa Dimalanta, band aid solution lamang ini.
Ang long term solution kuntani amo nga maka-connect ang mga isla sa main grid ukon may yara sang madamo nga kaugalingon nga suplay.
Suno naman sa mga bag-o nga power providers, kinahanglan man ini nga magdugang sang mas dako nga capital para masiguro ang matalunsay nga operasyon.
