Ginaduso nga mag-file sang complaint affidavit si Julie “Dondon” Patidongan alyas Totoy, matapos niya ginpangalanan ang pila ka pulis sa kontrobersyal nga kaso nga ‘Missing Sabungeros’.
Si alyas Totoy amo ang isa sa mga ginpasakaan sang kaso nga may kaangtanan sa mga nadula nga manugbulang.
Suno kay NAPOLCOM Vice Chairperson Atty. Rafael Calinisan, kun sa ila opisina mismo ipasaka ang affidavit, mas mapaayo kag mapasangkad ang imbestigasyon batuk sa mga nadalahig nga pulis.
Ginalauman sang komisyon nga magapasaka sang affidavit si Totoy.
Ginbuyagyag man sang NAPOLCOM nga may yara sila sang listahan sang mga pulis nga ginatudlo nga nalakip sa insidente, kag ginahanda na ang administrative investigation.
Una na nga ginpahayag ni Justice Secretary Jesus Crispin Remulla nga ginbutang na sa restricted duty ang 15 ka pulis nga ginatudlo nga may kaangtanan sa ginapatihan nga pagpatay sa mga nadula nga manugbulang.
