ILOILO CITY- Nagsugod na ang imbestigasyon sa ginaalegar nga iligal nga pagdakop sang mga pulis sa pila ka indibidwal sa sulod sang peryahan sa Barangay Pasil, New Lucena, Iloilo.
Sa interview sang Bombo Radyo Iloilo kay Atty. Michelle Yutoko, spokesperson sang National Police Commission Region 6, iya ginpahayag nga 19 ka mga indibidwal ang ginpreso sang mga pulis sa New Lucena Municipal Police Station kun sa diin ang iban diri ang mga babaye.
Suno kay Yutoko, nakabaton sila sang reklamo sa ginaalegar pilitay nga pagdakop sa mga indibidwal apisar nga nagalantaw lamang ang mga ini sa sulod sang peryahan.
Suno sa iya, posible nga mangatubang sa kaso nga administratibo ang mga pulis nga nag-aresto sa mga inosente nga sibilyan bangud sa grave misconduct.
Hibaluon man kung ginbasahan ang mga ini sang Miranda Rights bag-o ginpreso.
Nahibaluan nga ginbasura mismo sang Iloilo Provincial Prosecutor’s Office ang kaso batok sa mga ginpreso nga sibilyan kag wala man ginpabayad sang pyansa.
Kalakip man sa mga ginhilway amo ang magpamilya nga nagalagaw lang sa peryahan bangud birthday sang myembro sang ila pamilya.
