BACOLOD CITY – Ginatugyan sang National Police Commision sa Philippine National Police ang pagdesisyon sa madangatan sang isa ka police trainee nga nadakpan nga nagagamit sang illegal drugs sa Lacson St., Brgy 31, Bacolod City.
Ang police trainee amo si Patrolman Brin Jesta Gimotea, 32 kag na assign sa Bacolod City Police Station 1.
Sa interview sang Bombo Radyo kay Atty. Joseph Celis, Regional Director sang National Police Commission 6, iya ginpahayag nga subject for termination proceeding sang Philippine National Police si Gimotea.
Ini bangud nga suno kay Celis, yara pa sa field training program sang Philippine National Police ang nasambit nga Patrolman.
Ginpahayag ni Celis nga maathag nga may sala si Gimotea bangud bilang isa ka pulis, ginadumili-an ang paggamit sang illegal drugs.
Ang Philippine National Police man suno kay Celiz ang may gahum nga makapatigayon sang drug testing sa mga pulis samtang ang National Police Commission naman ang nagapatigayon sang inspection agud usisaon ang visibility, equipment kag ang qualifications sang mga pulis.
Mahimo man nga makahimo sang rekomendasyon ang National Police Commission sa kaso kun may yara sang jurisdiction.
