Natalana nga ipatawag sang National Police Commission (NAPOLCOM) ang pito ka mga pulis sang Sibalom Municipal Police Station lakip na hepe sang police station kasunod sang sila ang ginpa-Bombo bangud sa ginapahayag pagpangkastigo sa mga manogbulang.
Sa interview sang Bombo Radyo kay Atty. Michelle Yotoko, spokesperson sang NAPOLCOM Region VI, iya ginpahayag nga gin-cater man sang talatapan ang reklamo kag ginahulat na lang presensya sang mga kapulisan agud masugoran ang asessment.
Suno kay Yotoko, nakapadala na sila sang mensahe sa Sibalom Municipal Police Station agud atubangon nila ang ginaalegar nga pagpanakit sa mga manogbulang.
Gin-athag man sini nga duha ang nagkadto sa ila nga complainant kag isa diri ang pursigido gid nga magpasaka sang reklamo.
Ginalauman nga sa Myerkules sang aga, Pebrero 12, 2025 magaatubang ang pito ka mga pulis sa nasambit nga talatapan.
Kon mapamatud-an naman nga may kapaltahan ang mga pulis, mahimo sila magapangatubang sang administratibo nga kaso.
Una na nga ginpa-Bombo sang isa sa apat ka mga biktima sang ginapahayag pagpangkastigo kag indi makatarunganon nga pagtratar sa ila sang kapulisan.
Ginpanginwala man sang apat ka manogbulang ang alegasyon nga nagapangbali sila sang manok agud magdaog sa bulang.
