Ginpanginbulahan ni National Police Commission (NAPOLCOM) Executive Director Rafael Vicente Calinisan si PNP Chief, PGen. Nicolas Torre III, matapos niya ini tagaan sang gradong 9.9 para sa halos isa ka bulan nga pagserbisyo bilang hepe sang Philippine National Police (PNP) halin sang siya ang gin-appoint sang Mayo 29, 2025.
Suno kay Calinisan ang halos perfect nga grado ginbase sa malawig kag epektibo nga mga inisyatiba ni Gen. Torre nga nakatukib sang panginahanglanon sang publiko kag sang organisasyon sang pulisya.
Ginpabutyag sang opisyal nga nabatyagan gid ni Torre ang pulso sang publiko, kag may kapasidad siya nga sabton ini paagi sa aktibo kag tampad nga pagpanguna.
Ginsaysay man sang NAPOLCOM chief nga ang kulang nga 0.1 puntos hindi bangud may kulang si Torre, kundi bilang inspirasyon pa gid sa iya para magpadayon sa maayo nga pagserbisyo kag pagkabig sang PNP nga masaligan sang pumuluyo.
Si PGen. Nicolas Torre III amo ang una nga graduate sang Philippine National Police Academy (PNPA) nga natungdan bilang PNP Chief, matapos ang madugay nga pagpungko sang mga graduate sang Philippine Military Academy (PMA) sa pinaka-mataas nga pwesto sa kapulisan.
