SAN ENRIQUE, ILOILO – Magapatigayon sang independent investigation ang National Police Commission (NAPOLCOM) kaangot sa paglapta sang video nga wala sang may nagasabat kag sirado ang gate sang may nagpangayo sang bulig sa San Enrique Municipal Police Station.
Sa interview sang Bombo Radyo kay Atty. Michell Yotoko, spokesperson sang NAPOLCOM Region 6, iya ginpahayag nga nagmando na si Regional Director Atty. Jerome Asuga nga padalman ang reklamo kag tumuron kun matuod nga nagakatulog ang mga naka-duty nga pulis rason nga wala ang mga ini nagasabat sa nagapangayo sang bulig.
Magapadala man sila sang ila mga personnel nga maga-imbestigar sa hitabo.
Ginpahanumdom man sini sa mga pulis nga likawan ang pagtulog sa tion sang duty hours.
Sa tion nga mapamatud-an nga nakasala ang mga duty personnel, magapangatubang ang mga ini sang kaso administratibo.
Suno kay Yotoko, ang ila nga imbestigasyon ang lain man sa patigayunon nga imbestigasyon sang Philippine National Police.
