ILOILO CITY – Nagpaandam ang National Police Commission sa mga aplikante nga luyag magsulod sa Philippine National Police may kaangtanan sa modus sang mga fixer.
Ini ang kasunod sang nabaton nga impormasyon sang National Police Commission tuhoy sa mga aplikante nga nagabayad sa fixer agud nga makapasar sa eligibility test kag agud nga mapadasig ang application process.
Sa interview sang Bombo Radyo kay Police Inspector Romel Sta. Anna sang National Police Commission 6, iya ginpahayag nga wala ginapahanugutan ang fixer bangud nga makabig ini nga illegal.
Suno kay Sta. Ana, wala nagabaton sang bayad ang National Police Commission kabaylo sang paghatag sang reviewer agud nga makapasar examination ang aplikante.
Ginpahayag ni Sta. Ana nga wala sang personnel ang National Police Commission nga nagapanukot sang bayad gikan sa mga aplikante bangud nga makabig ini nga pagwaslik poder ukon usurpation of authority.
Panugyan sang natungdan sa mga aplikante, likawan ang pagpangayo sang bulig sa mga fixer kag sa baylo, sundon lamang ang nagakaigo nga proseso.
Mas maayo nga magpadulong sa National Police Commission sa Corner Fuentes-Ledesma Streets, Iloilo City, para masigurado nga makakuha sang exam.
Hiwaton ang police examination sa Abril 26 sa syudad sang Iloilo.
