ILOILO CITY – Ginpaandaman sang National Police Commission (Napolcom) ang Pototan Municipal Police Station nga pasakaan sang kaso administratibo sa ti-on nga indi sang mga ini mapasakaan sang kaso kriminal ang mga miyembro sang Triskelion Fraternity nga nagpatigayon sang hazing sa Fernando Parcon Ward, Pototan, Iloilo.
Sa interview sang Bombo Radyo Iloilo kay Allen Camiring, pre-charge investigator kag information officer sang Napolcom Region 6, ginpahayag sini nga katungdanan sang Pototan Municipal Police Station nga magpatigayon sang imbestigasyon kag pamatud-an nga naglapas sa Anti-Hazing Law ang mga miyembro sang Triskelion Fraternity.
Magapatigayon naman sang monitoring ang Napolcom sa Pototan Municipal Police Station kag sa tion nga indi ang mga ini magpatigayon sang imbestigasyon, ini ang pasakaan sang kaso nga irregularity in the performance of duty.
Samtang ginpaathag sang pamunuan sang Pototan Municipal Police Station kun nga-a wala na nagpasaka sang kaso ang mga neophyte sang Triskelion Fraternity batok sa mga nag-paddle sa ila.
Sa exclusive interview sang Bombo Radyo kay Police Senior Inspector Bonifacio Alabe, hepe sang Pototan PNP, ginpahayag sini nga mismo ang pamilya sang mga neophyte kag mga miyembro nga nag-paddle sa ila ang nagdesisyon nga indi na lang magpasaka sang kaso.
Suno kay Alabe, nahibaluan man sini nga may sala ang mga kabataan apang kun magpasaka sila sang kaso, maguba ang buwas-damlag sang mga kabataan nga involve sa hazing.