ILOILO CITY–Ginsabat sang pamunuan sang National Police Commission Region 6 ang reklamo ni dismissed Police chief inspector Charlie Sustento.
Ini may kaangtanan sa alegasyon ni Sustento nga naimpluwensiyahan sang gamhanan nga tawo ang madasig nga pagpagwa sang reinstatement order sang Napolcom para sa kontrobersiyal nga si PO1 Edwin Maprangala.
Sa interview sang Bombo Radyo, ginpahayag ni Atty. Joseph Celis, (NAPOLCOM) Region 6 director, nga wala sang sin-o man nga nag-impluwensiya sa Regional Afilliates Board nga ginapamunuan ni Atty. Jose Niego bilang chairman, Regional State Prosecutor kag ni Deputy Regional Director for Administration nga si Chief Supt. Carlito Feliciano sang Philippine National Police (PNP).
Suno kay Celis, kun madasig gid man ang pagresolba sang mga kaso sa Regional Afilliates Board kag Napolcom, ini bangud pila lang ka mga kaso ang pending.
Sa ombudsman kun sa diin yara ang kaso ni Sustento, madugay gid man bangud madamo ang mga pending kag nagasalalampaw nga kaso.
Gin-athag man ni Celis nga indi makadikta ang NAPOLCOM sa ano man nga desisyon sang Regional Afilliates Board nga amo ang nagpagwa sang desisyon sa pag-reinstate kay Maprangala.