Nagpahanumdom ang National Police Commission (NAPOLCOM) sa mga katapo sang kapulisan nga indi maghinambog kag magpasaway.
Ini ang kasunod sang pagsipa sang NAPOLCOM en banc sa mag-asawa nga pulis nga may kaso nga Grave Misconduct For Grave Threats and Unlawful Arrest sa pag-aresto sa kasilingan.
Ang mga ini amo sanday Patrolman Guillermo C. Bagatela kag misis sini nga si Patrolwoman Ma. Agnes Bagatela kag na-assign sa Regional Personnel Holding and Accounting Unit sang Police Regional Office 6 kag residente sang San Isidro Jaro, Iloilo City.
Magluwas sa ila ginpahalin man sa serbisyo sang NAPOLCOM en banc ang isa ka pulis bangud sa pagpangmolestya sa menor edad.
Ini amo si Patrolman Guillermo Agpayas sang 6th Special Action Battalion sa Sagay City, Negros Occidental.
Sa exclusive interview sang Bombo Radyo kay Atty. Joseph Celis, Director sang NAPOLCOM Region 6, iya ginpahayag nga indi trabaho sang NAPOLCOM en banc ang magbantay sang sala sang mga pulis kundi maghatag sang suporta sa ila serbisyo.
Apang suno kay Celis, ila naobserbahan nga madamo sang mga pulis ang nangin kampante na sa trabaho bangud sa prelibihiyo kag kataas sang panulok sa kaugalingon.
Suno kay Celis, madamo sang nagaapekto sa serbisyo sang isa ka pulis sa diin lakip diri ang pamilya, values kag disiplina sa kaugalingon.
Ginpahayag ni Celis nga kinahanglan magbugtaw na ang mga pulis kag kaayuhon ang trabaho bangud mangin apektado ang bug-os nga hanay sang Philippine National Police sa tion nga magsala ang bisan isa lamang sa ila.
“We are not privileged people to feel so privileged nga daw indi ta ya ordinaryo parehas sang iban nga tawo nga lain ka gid. It so happened that you are a steward of a public position in which you have to perform your duties to the best of your abilities in order to deliver what is expected of you as a public servant,” pahayag ni Celis.
Nagpanugyan man ang natungdan sa mga pinuno sang PNP nga padayunon ang disiplina kag pagtudlo sa mga pulis agud indi mangin kampante kag ihatag ang tagipusuon sa trabaho.
