Nagpanugyan ang pinuno sang National Police Commission Region 6 sa tanan nga mga katapo sang Philippine National Police nga mag-angkon sang disiplina sa trabaho.
Sa exclusive interview sang Bombo Radyo kay Atty. Joseph Celis, Director sang National Police Commission Region 6, iya ginpahayag nga kun ang isa ka police personnel ang maghimo sang krimen, wala pulos tanan nga awards ukon certificate nga iya naangkon.
Suno kay Celis, madasig magpatawad ang kultura sang Pilipinas kag madasig magkaluoy bisan pa sa mga kriminal.
Pahayag sang natungdan, mahuya man kuntani ang mga nagaserbe sa publiko kag seryosohon ang trabaho.
Ginpakamalaot man ni Celis ang pulis nga nagpatay sa isa ka mag-iloy sa Paniqui, Tarlac.
Matandaan nga nag-viral ang video sang mga biktima kaupod ang suspek kag ang iya anak samtang nagabaisay tubtub ginpatay sang pulis ang mag-iloy.
Ang mga biktima amo sanday Sonya Gregorio, 52 nga amo ang iloy kag anak sini nga si Frank Anthony Gregorio, 25, residente sang Barangay Cabayaoasan, Paniqui, Tarlac.
Ang nangluthang nga pulis amo si Police Senior Master Sgt. Jonel Nuezca, naka-destino sa Parañaque City Crime laboratory unit.
