Nagmando ang National Police Commission (NAPOLCOM) Region 6 nga ipaidalom sa summary hearing proceedings ang 10 ka personnel sang Criminal Investigation and Detection Group (CIDG) may kaangtanan sa kontrobersyal nga Pavia incident nga gin-alegar isa ka abduction nga natabo sang gab-i sang Pebrero 23.
Ini matapos nakitaan sang probable cause santo sa natapos nga motu proprio investigation ang reported abduction.
Sa interview sang Bombo Radyo kay Atty. Michelle Benitez-Yotoko, spokesperson sang NAPOLCOM Region 6, iya ginpahayag nga ginapreparar na ang pagpasaka sang formal charge batok sa 10 ka CIDG personnel.
Suno kay Yotoko, lakip man diri ang mga opisyal sang Iloilo Field Unit kag lakip man sa gin-usisa ang immediate officer sang mga involved nga personnel.
Dugang pa niya, base sa timeline sang imbestigasyon, posible nga sa sulod sang 60 working days mapadala na ang kaso sa central office.
Madumduman nga nagbilin sang kahadlok sa mga residente sang Pavia ang gin-alegar nga pag-abduct sa duha ka tawo sa magkatuhay nga lugar sa banwa sa isa lamang ka gab-i.
Nahibaluan nga una na nga ginpanginwala sang CIDG nga abduction ang natabo kag nanindugan nga kabahin lamang ini sang ila “Oplan Paglalansag Omega” ukon kampanya batok sa iligal nga armas bilang pagpatuman sang Republic Act 10591 ukon Firearms and Ammunition Regulation Act.
Kun mapamatud-an, mangatubang ang mga involved nga kapulisan sang possible nga 6 ka bulan nga suspension, rank demotion ukon dismissal sa serbisyo.
