ILOILO CITY– Suportado sang National Police Commission ang pagpatigayun sang 25th National Police Community Relations Month nga may tema ‘Pinaigting na ugnayan ng mamamayan at pulisya laban sa COVID-19 Pandemya sa maabot nga bulan sang Hulyo.
Sa interview sang Bombo Radyo kay National Police Commission Region 6 Director Atty. Joseph Celis, iya ginpahayag nga isa man sila sa magabulig sa Philippine National Police kag magapanguna man sa pagpatigayun sang nasambit nga aktibidad.
Mandato nila sa Napolcom suno kay Celis nga suportahan kag buligan sa pagtib-ong ang mga aktibidad sang pulisya basta sa maayo lang kag makabulig sa pumuluyo.
Pahayag pa niya nga ang aktibidad sa maabot nga Hulyo ang palaagyan agud mas mangin malapit kag mapabakod ang koordinasyon sang komunidad sa kapulisan.
Kun wala ang suporta sang pumuluyo suno kay Celis, mabudlay para sa mga pulis nga magpatuman sang mga layi kag pagsulundan.
Nagapangabay man ang natungdan sa tagsa-tagsa nga ugyunan ang mga lihok kag programa sang kapulisan.
