Importante gid para sa minilyon ka mga Amerikano nga makaboto sa 2024 presidential election.
Bisan ano pa ina kalayo, nagapangita sila sang paagi nga ipain ini nga espesyal nga adlaw para makapili sang nagakabagay nga lider nga magapamuno sa Estados Unidos sang Amerika sa masunod nga apat ka tuig.
Bisan sa guwa sang Earth, nagakapangitaan sang paagi agud nga makapasakop sila sa eleksyon.
Subong nga 2024, ang American astronauts nga yara sa International Space Station ang nakaboto na sandig sa record sang Harris County Clerk of Court’s Office sa Texas.
Ini amo sanday Don Pettit, Nick Hague, Butch Wilmore, kag Suni Williams nga nag-post man sang ila pictures sa Instagram nga naga-suksok sang patriotic-colored socks kadungan sang Election Day.
Ang medyas sang duha ka NASA astronauts ang may nakasulat nga “Proud to be American.”
Kabahin sila sang masobra 1.2 million ka mga tawo nga temprano nga nagboto sa Harris County sa state sang Texas.
“It’s a very important duty that we have as citizens and I’m looking forward to being able to vote from space, which is pretty cool,” suno kay Williams sa isa ka press interview sang Septyembre sang yara sila sa space station.
Apang paano bala nagaboto ang astronauts kun yara sila sa space station?
Ang astronauts nga nakahibalo nga wala sila sa Earth sa tion sang eleksyon ang mahimo maka-request sa Federal Post Card Applications nga magsumite sang absentee ballots ukon makaboto sang temprano nga may koordinasyon sa ila county clerk’s office.
Samtang, kun magboto sila samtang yara mismo sa space, mahimo ini mapadala sa USA kaangay sang data nga masami man nga gina-transmit sa tunga sang space station kag Mission Control Center sa Johnson Space Center sang NASA sa Houston, Texas.
Mabaton ang data paagi sa Near Space Network nga amo ang network sang antenna systems kag relay satellites.
Kun ma-fill out na sang astronaut ang electronic ballot, magahulag ang document paagi sa “track and data relay satellite system” sang network pakadto sa ground antenna sa Las Cruces, New Mexico.
Halin sa amo nga facility, isaylo sang NASA ang balota sa Mission Control kag diretso sa county clerk nga amo ang may katungdanan sa casting sang balota.
Encrypted ang balota kag mahimo lamang ma-access sang astronaut kag sang clerk.
Nahibaluan nga nagaboto na ang astronauts sa US elections sa sulod na sang halos tatlo ka dekada. Si David Wolf amo ang una nga American nga nagboto sa space samtang sakay sa Mir Space Station sang Russia nga gin-operate halin sang 1986 tubtub sang 2001. #
