Nagapanawagan sang bulig ang mga residente sang Brgy. Benedicto, Jaro, matapos ang nagluntad nga sunog sa ila barangay kahapon nga adlaw.
Sa interview sang Bombo Radyo kay Alyas Kath, isa man sa mga nasunugan, iya ginpahayag nga lawas lang gid nila ang ila nasalbar sa nagluntad nga sunog.
Nagapasalamat man ini nga luwas sila tanan sang iya mga kaupod sa balay, apang nagakasubo man ini bangud nga wala na sila sang puluy-an nga pagabalikan.
Madumduman nga naglab-ot sa 4th alarm ang nasambit nga sunog antes ini nga napalong.
Nagdangat naman sa 52 ka mga balay ang natupok sang kalayo kun sa diin 48 diri ang totally damaged kag 4 naman ang partially damaged.
Sa subong, temporaryo nga nagadayon ang mga apektado nga mga residente sa Barangay Hall sang Brgy. Benedicto, samtang ang iban naman ang nagtinir sa ila nga mga himata.
Nahibaluan nga naghatag naman sang bulig ang syudad sang Iloilo, lakip na ang pagpadala sang folding bed, foam kag tubig para sa mga residente.
