ILOILO CITY – Ginakabig nga isa ka isolated case gid lamang ang natabo nga pagpang-hold up sa Barangay Pasig, Lambunao, Iloilo.
Sa amo nga hitabo, patay ang driver sang delivery van nga si Jerry Faldas, residente sang Veterans Village, Iloilo City nga nakaangkon sang pilas sa dughan kag ulo.
Ang duha naman ka pahinante amo sanday Elbert Mardoquio, 37, residente sang Brgy. Inaladan, Cabatuan (may pilas sa likod); kag si Jeriel Nalangan, 35, residente sang Brgy. Libot, Calinog (may pilas sa wala nga butkon kag daplis sa ulo).
Sa interview sang Bombo Radyo kay Lambunao, Iloilo Vice Mayor Arvin Losaria, iya ginpahayag nga natabuan nga wala sang presensya sang otoridad malapit sa lugar sang kag planado na ang amo nga pagpang-hold up.
Dugang pa niya, ang lugar ang makabig nga ambush area bangud nga takladon ini kag mahapos para sa mga kriminal nga maghimo sang krimen.
Ini ang pinakauna nga natabo nga pangpang-hold up kun sa diin, magluwas sa pagkuha sang kwarta, may ginpatay pa ang mga kriminal.
Sang natabo ang krimen, gilayon nga naghatag sang instruction ang alkalde sang banwa sa katapo sang kapulisan nga solbaron ang nasambit nga krimen.
Ang ini nga pagpamatay ang lubos nga ginakondenar sang mga opisyal sang banwa.
Sa subong, padayon pa ang case build up sang kapulisan kag indi pa matumod kun bala, rebelde nga New People’s Army ang may kahimuan sini base sa pula nga ribbon nga nakita sa isa sa mga suspek.
Nagpanawagan naman si Losaria sang kooperasyon nagikan sa publiko.
