‘Natabuan lang’
Ini ang nangin assessment sang Department of Health (DOH) Region VI may kaangtanan sa kaso sang mga napatay matapos nagpabakuna batok sa COVID-19.
Sa interview sang Bombo Radyo kay Dr. Jessie Glen Alonsabe, head sang Regional Epidemiology and Surveillance Unit sang DOH Region VI, iya ginpahayag nga santo sa ila rekord, halos tanan nga mga nagtaliwan bangud sa COVID-19 apang nabakunahan na sang first dose ukon fully vaccinated na ang may yara na sang comorbidity ukon nanuhay-tuhay nga balatian.
Suno kay Alonsabe, dako man ang posibilidad nga bangud immunocompromised patients ang mga ini, madasig sila nga gintapikan sang virus apisar nabakunahan na.
Pahayag ni Alonsabe, wala pa sila sang may narekord nga COVID-19 vaccine ang rason sang kamatayon sang isa ka pasyente.
Gin-athag man niya nga bag-o kag matapos ipaidalom sa COVID-19 vaccination, ginatsikyar sang maayo ang kondisyon sang isa ka indibidwal.
Samtang, nagabulig ang DOH Region VI, sa imbestigasyon may kaangtanan sa isa ka pulis nga nagtaliwan matapos ginapahayag naglain ang pamatyag umpisa sang nakabaton sang first dose sang COVID-19.
Ang nasambit nga police personnel ang ginapahayag may balatian nga diabetes.
Suno kay Alonsabe, ang tanan nga rekord sang amo nga pulis humalin sang ginpaidalom ini sa COVID-19 vaccination kag gin-admit sa ospital, ang ginatinguhaan nila nga makuha kag matipon agud matul-id ang matuod nga gintunaan sang kamatayon sini.
Matandaan nga Hunyo 17 sang nag-avail ang pulis sang first dose sang COVID-19 vaccine kag pagkasunod nga adlaw, naglain ang pamatyag sini rason nga nag-file ini sang sick leave.
Hunyo 25 sang napatay ang pulis bangud sa cardiac arrest sa diin sang Hunyo 26, naggwa ang resulta sang COVID-19 test kag ginpahayag nga nagpositibo ini sa COVID-19.
