Nagdepensa si Agriculture Secretary Francisco Tiu Laurel Jr. nga may bastante nga basehan sa pagdeklarar sang food security emergency sa Pilipinas.
Pahayag sini, tuman ka klaro ang data nga ginpresentar sang National Price Coordinating Council (NPCC) nga mataas gihapon ang presyo sang bugas bisan pa nga ginpanubuan na sang gobyerno ang taripa sa imported rice.
“The data was very clear when we presented it to the NPCC. We have solid data that show that it is really justified,” pahayag ni Tiu Laurel sa press briefing sa Malacañang.
Dugang sini, ginahulat na lang sini ang council nga pormal nga makapasa sang rekomendasyon sa Department of Agriculture (DA) para sa deklarasyon sang emergency. Kun mabaton na niya ini, magapangayo si Tiu Laurel sang komento halin kay President Ferdinand Marcos, Jr.
“End of January siguro (declaration). Ang target namin i-offer (NFA stocks) sa LGUs and other government agencies in February,” pahayag sini sa separado nga interview matapos ginkumpirma nga “approved in principle” na ang resolution sang council.
Sa idalom sang bag-o lang napirmahan nga Republic Act 12078 ukon ang Agricultural Tariffication Act, kun may rekomendasyon na ang NPCC, may gahum na ang DA nga magdeklarar sang amo nga emerhensya.
Ini ang ginalantaw nga sabat kun kulang ang suplay ukon may ‘extraordinary increase’ ukon indi kinaandan nga pagsaka sa presyo sang bugas.
Kun madeklarar na ang food security emergency, pahanugutan na ang National Food Authority (NFA) nga ma-release ang rice buffer stocks sa market kag buslan ini sang locally produced palay.
