Imposible na nga mapirmahan ni President Ferdinand ”Bongbong” Marcos Jr. ang P6.352 trillion national budget plan para sa masunod nga tuig sa Biyernes, December 20, 2024.
Suno kay Executive Secretary Lucas Bersamin, ang pagpaiway sang pagpirma sang General Appropriations Act ang may katuyuan nga maghatag sang mas malawig nga tion agud nga mabusisi sang maayo ang hagna nga magadeterminar sang mangin dalagan sang pungsod sa masunod nga tuig.
Ginpahayag ni Bersamin nga konsultahon ni Marcos ang mga heads sang major departments sa isa ka “ongoing assessment.”
Una diri, ginduso ni Senator Imee Marcos kag ni Senator Juan Miguel “Migz” Zubiri ang pagbalik sang ratified 2025 budget bill sa Kongreso.
Ila ginpahayag nga may opsyon ang Presidente nga mag- request sang Bicameral Conference Committee (bicam) agud maghimo sang revisions.
Ini may kaangtanan sa concern ni Zubiri sa potensyal nga paglapas sa constitutional mandate nga ang edukasyon ang dapat hatagan sang pinakamataas nga budgetary priority.
Pahayag ni Zubiri, sa baylo nga education, ang public works pa subong ang hatagan sang pinakadako nga budget nga baliskad sa nasaad sa konstitusyon.
Suportado man ni Senator Imee Marcos ang suhestiyon ni Zubiri.
Pila sa kwestiyonable nga budget items nga ginsita ni Senator Marcos amo ang P26 billion allocated para sa Ayuda sa Kapos ang Kita Program (AKAP), pagkakas sang PhilHealth subsidy, kag ang dako nga increase sa Department of Public Works and Highways (DPWH) budget nga yara na sa P1.1 trillion.
Samtang, may kaangtanan gihapon sa proposed 2025 budget, ginkaakig ni Senadora Loren Legarda sang nahibaluan ang balor sang proposed budget nga gamiton sang Philhealth para sa ila nga 30th anniversary sa February 2025.
Ini bangud nabusisi sa hearing sang Senate Committee on Health and Demography ang alokasyon sang budget para sa anibersaryo sang Philhealth nga nagalab-ot sa P138 million.
