Text by: Bombo Ray Gerald Badiang
Suportado sang National Commission on Senior Citizens ang ginaduso subong sa Senado nga “Parents Welfare Act of 2025”.
Ini nga hagna nga gin-file ni Senador Panfilo Lacson ang nagatuyo nga pabakudon pa ang pundasyon sang pamilyang Pilipino pinaagi sa pag-obligar sa mga kabataan nga atipanon kag suportahan ang ila mga tigulang nga ginikanan.
Sa idalum sang proposal, ginakabig nga kriminal nga akto ang pagpabaya ukon pag-abandona sa mga elderly parents, kag posible nga atubangon sang mga kabataan ang penalidad kon mapamatud-an nga ila ginpabayaan ang ila mga ginikanan.
Sa interview kay Edwin Espejo, Commissioner sang National Commission on Senior Citizens, ginpahayag sini nga iya ginaabi-abi niya ang ano man nga hagna nga nagatuyo hatagan sang proteksyon ang mga ginikanan ilabi na ang mga tigulang na.
Apang ginpahayag man ni Espejo nga mas maayo nga ibutang ini sa isa ka komprehensibo nga layi nga amo ang Anti-Elderly Abuse.
Suno kay Espejo, ginakilala sini ang masakit nga kamatuoran nga may mga katigulangan nga ginapabay-an ukon ginabayaan sa ospital, ukon ginalimtan sang ila kabataan.
Pahayag niya, may mga factors kun ngaa nakakatabo ini kaangay sang kapigaduhon rason nga ginlantaw niya nga may posibilidad nga mangin “anti-poor” ang layi kun indi ini matun-an sang husto.
Nagpanawagan naman si Espejo sa gobyerno nga dapat mangin bukas ang mata sang mga mamalidha sa mas madalom nga rason kon ngaa nagakatabu ang pag-abandona, kag indi lang magpokus sa pagsilot.
Luyag sini nga ang layi mangin instrumento sang proteksyon kag pagpalangga sa mga katigulangan, kag indi mangin palas-anon sa mga kabataan nga nagakinahanglan man sang bulig.
