ILOILO CITY-Nagpabutyag sang pagkadismaya ang isa ka myembro sang National Committee on Language and Translation sa idalom sang National Commission for Culture and the Arts, sa libro ni Vice President Sara Duterte nga “Isang Kaibigan.”
Sa interview sang Bombo Radyo kay Prof. Jose Julie Ramirez, nga nagatudlo sa College of Arts and Sciences-Humanities UP Visayas, iya ginpahayag nga ang libro ang isa ka political nga propaganda nga ginsulat ni VP Sara para maistoryahan ini sa tunga sang nagasarurot nga political career bangud sa pagsipak sa administrasyon ni Marcos.
Suno kay Ramirez, wala sang bag-o sa content sang libro bangud madugay na ini nga istorya sa nanuhay-tuhay nga Kultura.
Pahayag sang professor, ang paggamit sang sapat bilang karakter ang indi na man bag-o kag ang laragway sa teksto ang gin-gamitan sang Artificial Intelligence para ma- enhance ang presentasyon sini.
Dugang sang natungdan, para sa iya nga nagatudlo sang masobra isa ka dekada sang lenggwahe kag literature, mas maayo nga balikan ang kultura kun sa diin makakuha sang mas madamo nga materyal nga magamit sa pagtudlo.
Suno pa sa iya, handom niya nga makabulig sa pagsanyog sang kalidad sang edukasyon, unahon anay ang pagpatukod sang classrooms.
Ginasuhestyon man niya ang pag-hire sang manunudlo para masolusyunan ang kakulangan sang teachers kag hatagan sang competitive salary.
Samtang, natalana naman magsapol ang National Committee on Language and Translation para nga maka-isyu sila sang official statement.
Ini ang patigayunon sa Septyembre 8 sa Cebu.
