ILOILO CITY – Nagapanawagan ang Catholic Bishops’ Conference of the Philippines sa tanan nga mga pumuluyo nga katoliko nga mag-upod sa dululungan nga pagpangamuyo sang santos nga rosaryo bwas nga adlaw, alas otso sa aga kadungan man sang pagselebrar sang National Consecration to the Immaculate Heart of Mary kag lakip man ang kapistahan ni Our Lady of Fatima.
Sa interview sang Bombo Radyo kay Rev. Fr. Angelo Colada, director sang Commission on Social Communications sang Archdiocese of Jaro iya ginpahayag nga patigayunon ang dululungan nga pagpangamuyo sa bilog nga pungsod lakip man sa nagkalain-lain nga parokya sang Archdiocese of Jaro nga pagapangunahan ni Jaro Archbishop Most Rev. Jose Romeo Lazo, D.D kag pagasundan sang santos nga misa.
Suno kay Colada, indi na kinahanglan pa nga magpadulong sa mga parokya kag simbahan ang mga tumuluo bangud mahimo sila nga makapamati sa ila tagsa ka mga balay paagi sa radyo kay may yara man sang live streaming online.
Dugang sang natungdan, paagi sa pagpangamuyo bilang isa ka pungsod kag simbahan mahatagan kita sang grasya kag kaluoy sang Ginoo agud matapos na ang pandemya nga ginapangatubang sang pungsod lakip man diri ang pagpangayo sang pag-ampo sa Birheng Maria para sa pag-ayo sang tanan kag sa pagpanumbalik sang maayo nga ikaayong lawas sang mga nahalitan sang pandemya, sa pagpabakod kag pagdampig sa mga frontliners.
Samtang natalana naman sila nga makigsapol kaupod si Iloilo City Mayor Jerry Treñas, COVID team sang syudad kag Regional Inter-Agency Task Force agud istoryahan kun mahimo na nga ibalik ang pagpahiwat sang misa sa tion nga ipaidalom na sa low risk ang syudad sang Iloilo sa masunod nga semana.
Santo sa pahayag ni Colada, ginahitso naman nila ang ila plano kag pagsulundan sa tion nga tugutan na liwat ang pagpatigayon sang misa.
