ILOILO CITY – Napaslawan ang National Food Authority nga malab-ot ang optimum level sang national rice buffer stock requirement nga 300,000 metric tons sang 2022 suno sa annual report sang Commission on Audit.
Suno sa state auditor, ang rice buffer sa bilog nga tuig 2022 ang yara lamang sa 111,000 tubtob 182,000 metric tons.
Ang numero sang buying stations kag mobile procurement teams sang ahensya ang nagnubo humalin sa 598 sang 2020 tubtob sa 232 sang 2022 bangud sang restructuring program sang National Food Authority base sa Republic Act No. 11203 ukon Rice Tariffication Law
Ini apisar nga nagbaton ang ahensya sang P7 billion subsidy nagikan sa national government.
Suno pa sa Commission on Audit, yara sa 177,349 metric tons ukon 36.95 percent ang shortfall sang ahensya ang sa targeted palay procurement nga 480,000 metric tons kag indi bastante ang information dissemination sang ila nga palay procurement program.
Lakip sa mga rason nga nakita sang state auditor sa pagnubo sang targeted palay procurement sa low absorption rate sang palay sa mga masunod:
mataas nga farm gate price sang palay kun ikumpara sa buying price sang National Food Authority nga P19.00 per kilogram
pag-agi sang mga mabaskog nga bagyo sa major palay production areas; kag
ginpabaskog sang mga private traders ang procurement strategies pinaagi sa pagtanyag sag mas madamo nga incentives kaangay sang ree delivery, consignment, advance payment, kag libre nga paggamit sang postharvest facilities.
Suno pa sa Commission on Audit, 36,877 metric tons lamang ang nabakal sang ahensya sa Central Luzon, 125,496 metric tons sa Cagayan Valley, kag 20,550 metric tons sa Western Visayas, ukon may katumbas nga 2.06 percent sang total production sang top three rice-producing regions.
Natukiban man sang state auditor nga nagbakal sang kabilugan nga 257,896 bags ang ahensya nagikan sa siyam sa 81 ka probinsya nga nagpasakup sa Palay Marketing Assistance Program for Legislators and Local Government Units sang 2022.
Ini ang ginalakipan sang Ilocos Sur, Isabela, Tarlac, Laguna, Occidental Mindoro, Quezon, Capiz, Iloilo kag North Cotabato.
