ILOILO CITY – Ang national headquarters ang magapatigayon sang imbestigasyon may kaangtanan sa despidida sang Bureau of Fire Protection Region 6 nga ginpatigayon sa Boracay Island.
Ini ang ginkumpirma sa Bombo Radyo ni Fire Senior Inspector Stephen Jardeleza, tagpamaba sang Bureau of Fire Protection Region 6, may kaangtanan sa kontrobersya kun sa diin may isa ka personnel sang nasambit nga ahensya nga nagpositibo sa Coronavirus Disease 2019 (COVID-19).
Suno kay Jardeleza, ang grupo nga ginapamunu-an ni Fire Chief Inspector Roel Jeremy Diaz na ang magapanguna sa imbestigasyon agud mahibalu-an gid kun ano ang natabo.
Ginpahayag ni Jardeleza nga ang team halin sa Metro Manila ang magapadulong sa syudad sang Iloilo kag sa isla sang Boracay agud nga magtipon sang impormasyon.
Sa subong, nagalab-ot sa 196 ang nalakip sa close contacts sa 28 ka personnel sang nasambit nga ahensya kun sa diin ginpahayag ni Jardeleza nga ang tanan nga yara sa listahan ang yara na sa isolation facility.
Ang 28 naman ka mga personnel ang gin-relieve na sa pwesto apang suno kay Jardeleza, wala pa siya sang may nabaton nga kopya sang nasambit nga order.
No comment naman ang natungdan tuhoy sa mga nagalapta nga impormasyon ilabi na ang nagalapta nga laragway sa social media tuhoy sa despidida nga ginpatigayon sa Anini-y, Antique.
Sa pagpaathag ni Jardeleza, sang Martes, Hunyo 16, lang siya gin-assign bilang spokesperson sang Bureau of Fire Protection Region 6 rason nga ang iya lamang nga basehan amo ang mga dokumento kag kun ano ang mandu sang mga opisyal sang nasambit nga ahensya.
