ILOILO CITY – Manggaranon sa heritage ukon palanublion ang Pilipinas rason nga ginasaulog ang National Heritage Month sa tagsa ka Mayo.
Sa Good Morning Philippines Program, ginpahayag ni Dr. Jose Jimenez Patubo, Municipal Tourism Officer sang San Enrique, Iloilo kag cultural advocate, nga ang tema subong nga National Heritage Month amo ang “Mga Kuwentong Pamana” (Stories of Heritage).
Suno kay Patubo, ang heritage ang natunga sa tangible kasubong sang building, gamit kag iban pa nga butang nga makita kag mauyatan kag intangible kasubong sang pagpati, istorya kag musika.
Bilang pagsakdag sang gobyerno sa National Heritage Month, ginmandu-an sang Department of the Interior and Local Govenrment ang tagsa ka Local Government Unit nga maghimo sang pamaagi sa pagtib-ong sang cultural heritage para sa mga ulihing tubo.
Bilang cultural advocate, ginpahayag sang natungdan nga indi mahinago nga tuman ka dako ang gap sa tagsa ka henerasyon kun ihibalo tuhoy sa cultural heritage ang pagahambalan.
Sa bahin sang Local Government Unit sang San Enrique, isa sa ila ginhimo amo ang adlaw-adlaw nga pag post sa social media sang mga istorya nga makuhaan sang ihibalo tuhoy sa kultura sang Pilipinas.
Bangud nga indi tanan ang may yara sang access sa internet, daku ang katungdanan sang mga ginikanan ukon katigulangan sa pagtudlo sa mga ulihing tubo tuhoy sa kultura sang tagsa ka lugar sa pungsod.
Isa sa ginhalimbawa sang natungdan amo ang natukiban nga 6 ka simboryo sa San Enrique nga simbolo sang mainuswagon nga ekonomiya sang banwa kun sugar industry ang pagahambalan.
