ILOILO CITY – Wala pa sa gihapon sang sabat ang National Inter-Agency Task Force (IATF) sa kaathagan nga ginapangayo sang Iloilo City Government may kaangtanan sa quarantine classification sang Syudad sang Iloilo sa bulan sang Disyembre.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi man mag-apelar ang syudad sa ginpatuman nga General Community Quarantine (GCQ) status apang magapangayo lang sang kaathagan bangud manubo na ang kaso sang COVID-19 sa syudad kun ipaanggid sang nagligad nga bulan.
Suno kay Treñas, nagpadala na siya sang sulat sa diin iya ginpatpat ang numero sang mga COVID-19 cases sa kada local government unit sa Western Visayas.
Bangud sini, nakit-an suno kay Treñas nga mas madamo pa ang kaso sang COVID-19 sang iban nga banwa apang yara sa manubo nga classification nga Modified General Community Quarantine (MGCQ).
Ginpahayag man sang alkalde nga maayo man nga ginpaidalum sa GCQ ang syudad sang Iloilo agud malimitahan ang social gatherings apang kinahanglan may yara sang kaathagan kun diin nagbase nga guidelines ang National IATF.
Dugang pa sang natungdan nga indi man siya pabor nga buksan na ang mga balay ilimnan kag iban pa nga establisyemento komersyal nga mahimo dugukan sang pumuluyo subong nga holiday season.
