ILOILO CITY – Nagaplano ang National Irrigation Administration (NIA) nga magtipon sang ginabanta P800 billion agud nga mapatubigan ang isa ka milyon ka ektarya sang duta sa bilog nga pungsod pinaagi sa public-private partnerships (PPP).
Suno kay NIA Administrator Benny Antiporda, ang mga duta ang wala napatubigan bangud sa kakulang sang pondo.
Ang NIA ang magalunsyar sang proyekto nga ‘NIA Para sa Bayan’ kun sa diin, ang una sini nga objective amo ang ‘optimization of water’.
Suno pa sa iya, ang mga investors ang makakuha sang revenue pinaagi sa pag-generate sang renewable energy sa dams, sa aquaculture, hydroelectric power plants, kag solar panels.
Ang direksyon sang NIA sa idalom sang subong nga administrasyon amo ang pagtukod sang mga dam sa bilog nga pungsod.
Dugang pa ni Antiporda, ang programa sang ahensya ang mahimo nga matigayon sa sulod sang anum ka tuig gani, ang masunod nga administrasyon ang makabenepisyo nagikan diri.
